Home Blog 一首講述性工作者嘅廣東流行歌:李克勤嘅《二十四城記》

一首講述性工作者嘅廣東流行歌:李克勤嘅《二十四城記》

by 新東寶翻譯製作
1 minutes read

最近都有聽J.Arie嘅新歌《龍鳳登場》,除咗MV有HKSP各位會員嘅客串演出之外,詞神梁柏堅(連登會員狗宮格?)嘅填詞更係一絕,冇諗到原來堅爺有睇明日見未來,呢樣有少少出乎意料。

講到廣東歌嘅歌詞,小弟一直都認為歌詞係非常重要嘅語言文化,由細細個就開始聽嘅兒歌,到大個咗開始聽流行歌,到再大個啲就聽返舊時嘅流行歌,廣東歌嘅歌詞一直都傳承住每一個唔同年代嘅回憶同故事,特別係反映社會現狀嘅歌曲,更加係見證時代嘅變遷同迭變,用流行歌譜上時代巨輪嘅樂章。

今日呢篇專欄,小弟就將AV嘢暫時擺埋一邊,獻醜同大家分享我對一首廣東歌歌詞嘅個人解讀。揀呢首歌嘅原因都相當特別,因為呢首係少見地描述「援交」、「性工作者」嘅心理掙扎,以及社會各界點樣用異樣目光去看待佢哋嘅廣東歌,由林若寧填詞,收錄喺李克勤「THREESOME」專輯入面嘅《二十四城記》,亦係李克勤嘅「社會四部曲」之一。

她 輾轉幾多張床 錯將溫柔釋放

無盡過客 買她的笑容 惹起有色眼光

歌詞第一句就已經直接交待主角嘅職業同身份,「錯將溫柔釋放」係一個好好嘅形容,最私人嘅床上溫柔應該留俾最愛嘅枕邊人,主角就將呢份溫柔放喺錯誤嘅對象身上。

 

被 燦爛時代埋葬 埋藏純真與期望

年邁少女 青春翅膀 沒法飛沉下去 浮沉在大染缸

令到一位女性走向性工作者呢個職業嘅原因,可能只有佢本人先真正知道,但每個人當初都有嗰份純真,同對未來充滿嘅期望,只係被時代嘅洪流所掩沒,青春嘅翅膀仍然存在,只係已經無力再飛。

 

有誰會 憐憫她一次 珍惜她成熟得幼稚

卻插上罪人旗幟 譜成人世間趣事

群眾 群眾 還向她非議 沾污她這一個孩子

當初她信奉有個天使 生存有善意

普遍世人同社會,都對性工作者嘅職業充滿偏見,好少會有人探究到底令佢哋行上呢條道路嘅原因係乜嘢,只係將佢哋當成一個茶餘飯後嘅娛樂話題;就算性工作者本身對未來同其他人仲有一絲希望都好,都會因為佢哋嘅職業而受盡歧視,而令到呢份「善意」慢慢褪減。

 

她 只許滿足虛榮 滿足一時高興

懷內每個 喊不出姓名 怕將背影看清

每一段交易都係一個短暫嘅快樂,就算大家喺對方身上得到滿足都好,都只係轉眼即逝;而曾經將自己摟在懷裏嘅人,又或者曾經摟喺自己懷裏嘅人,有需要記得佢哋嘅大名嗎?人來人往,來也匆匆,去也匆匆,大家都只係對方嘅過客,甚至連離別嘅背影都冇需要看清,留情只會拖累彼此。

 

全個城市 誰愛她一次 關心她殘酷的往事

哪裡有大人留意 只談遊戲式政治

遊戲式政治,最近呢十年八年一直都有,不過而家嘅環境,應該連「談」嘅機會都唔再需要了。

 

追風箏故事太過相似 小城說大志

唔一定係性工作者,就算普羅百姓,都可能經歷緊類似嘅歧視、偏見,無論係辦公室入面嘅小圈子,定係校園入面嘅欺凌事件,每日喺呢個城市、呢個社會、呢個地球,不斷發生。

 


講述社會現況嘅流行歌,近幾年真係買少見少,可能係因為而家大家都對現狀好滿意,所以已經冇需要再靠歌詞嚟抒發心中嘅鬱悶,只能夠講香港想唔穩步發展都幾難。

請讓我哋繼續心存有善意,小城說大志。

You may also like

Leave a Comment

此網站只適合二十一歲或以上人士進入,內容可能令人反感及驚嚇;不可將此區的內容派發、傳閱、出售、出租、交給或借予年齡未滿 21 歲的人士或將本網站內容向該人士出示、播放或放映。 LEGAL DISCLAIMER WARNING: THIS SITE CONTAINS MATERIAL WHICH MAY OFFEND AND MAY NOT BE DISTRIBUTED, CIRCULATED, SOLD, HIRED, GIVEN, LENT,SHOWN, PLAYED OR PROJECTED TO A PERSON UNDER THE AGE OF 21 YEARS. 本人已滿 21 歲 ,above age of 21,同意進入 *本網站經由第三者於美國境內以不抵觸美國加州法例條文發放及儲存*
I am 21 or Older I am Under 21