Home Blog 去AV女優event前做足準備:流程篇

去AV女優event前做足準備:流程篇

by 新東寶翻譯製作
3 minutes read

相信有留意AV女優資訊嘅朋友都有留意到,由23年下半年開始,日本AV女優喺香港出席活動、見面會等等嘅次數越嚟越頻密,對於唔方便出國,又或者好難夾到時間去到心儀女優嘅日本活動嘅朋友,香港嘅活動就成為佢哋嘅唯一希望。至少,都叫做慳咗一程機票錢先。

如果想體驗原汁原味嘅AV女優event嘅話,小弟都係推薦大家去日本玩一次,始終喺當地玩嘅體驗一定係最有感覺;大概喺一年之前,小弟就寫咗一篇「去AV女優event前做足準備:用品篇」,既然用品都準備好,當然都要了解一下日本呢啲AV event嘅流程同內容,玩嘅時候先至唔會咁不安同驚出事,以下小弟就根據event流程入面嘅順序,同大家分享一下日本恆常嘅AV女優event流程,睇睇同你喺香港玩到嘅,又有冇啲咩大分別?

GLGw7f6bEAAlLaX

(片商FALENO喺4月中旬舉辦嘅四人女優共演event。)


排隊時間

順利買到參加劵,喺event嘅指定時間內到達現場,第一件事當然就係懷住興奮嘅心情同一班毒撚大叔排隊。喺秋葉原有一班大叔FANS,幾乎喺每一個女優嘅event都會見到佢哋嘅身影,如果聽得明日文嘅話,有時會聽到佢哋交流去唔同女優event嘅經歷同心得,例如邊一間店鋪最近換咗新Staff,去咗邊一個女優嘅見面會好抵玩等等。你甚至唔需要插嘴,只係靜靜哋喺旁邊「偷聽」,有時都會聽到唔少有用嘅資訊。

除此之外,排隊人流入面當然會有當日活動女優嘅死忠FANS,小弟臉皮比較厚,只要見到熟悉嘅臉孔,都會輕輕點個頭打個招呼,甚至有時會鼓起勇氣問對方食咗飯未;至於點分別死忠FANS呢?一件有印住女優大名嘅TEE,一把設計精美嘅應援扇,甚至係印住女優名字嘅燈牌,都係代表住嗰位女優喺佢心目中嘅地位,見到呢啲應援物件嘅話無需猶豫,喺你面前嘅就係活動女優嘅大神級FANS。

GFmsvoRaEAAL6Et

(整得靚嘅話,有啲女優仲會主動拎上手俾你影相。)

喺排隊嘅時候大家都冇嘢做,吹水打發時間,交流event心得,就係最好嘅交際活動;同埋有時排隊嘅時候見盡FANS之間嘅人生百態,都係event嘅一個有趣之處。


影相時間

「撮影タイム」,亦即係影相時間,就係event正式開始嘅第一個環節,拎穩你嘅相機/手機/即影即有相機,幾十秒嘅攝影時間,就係你同女優之間嘅第一次親密接觸。

作為半個識少少影相嘅毒撚,我自己好enjoy每次去完event之後睇返影完嘅女優相片,無論影得差又好,影到out晒fo都好,都係屬於我同個女優之間嘅回憶。嗰一張因為緊張所帶嚟嘅手震,仲有呢一張捕捉到女優未擺好pose就唔小心㩒咗快門影到嘅醜照,都係難忘嘅回憶嚟。

更加唔駛講嗰啲影得好好,將女優最靚嗰一面影晒出嚟嘅沙龍相,用嚟做wallpaper又或者晒出嚟擺喺枱頭,每一次見到張相都會忍唔住會心微笑,諗返起當時嘅開心回憶,毒撚嘅快樂,就係咁簡單。

GLhALNKa0AA2jql

(最近非常受一班秋葉原大叔歡迎嘅八木奈々,除咗對應一流之外,影相擺pose都係相當有誠意。)

以前event嘅影相時間唔係好似而家咁樣一對一,女優只會望住你一個鏡頭,以前嘅event因為想俾多啲人參加,會有女優喺同時間對5-6個FANS嘅情況出現,女優會逐個鏡頭停留1-2秒,直至所有鏡頭都望過一次之後先至轉下一個動作,我自己就當然係鐘意而家呢種一對一嘅做法,自己嘅鏡頭獨佔女優,影起上嚟都特別享受。

如果有少少日文基礎嘅話,喺攝影時間入面可以request女優擺出你想要嘅pose,當然一切都係以女優本人意願為準,一啲太大尺度嘅動作,又或者太難嘅動作,女優係有權去拒絕你嘅要求,所以大家要求嘅時候都唔好太勉強喔。

GIzFOIObMAA7VYO

(講到專業對應同專業擺pose,當然唔少得我哋嘅新ありな。)

合照時間

並唔係每一個參加嘅朋友都識得影相,又或者鐘意影相,所以呢一張合照可能先係佢哋覺得成個event最有價值嘅地方。喺影合照嘅時候,大部份都可以要求想要嘅特訂 pose,如果冇idea嘅女優多數都會自動波挨埋嚟你身邊,砌心、拖手、一齊畀V等等,都係常見嘅選擇嚟。

我自己會建議最好自己有一個獨特嘅pose,去到唔同女優嘅event都會用呢一個獨特pose同每一個女優合照,若干時間之後當你整理返啲相,見到同一個pose出現喺唔同女優身上,嗰種集郵嘅感覺會更加強烈;就算你只係會去一個女優嘅event都好,呢一種每次都用同一個pose影出嚟合照,都有佢嘅特別意義存在。

KDqvKD0

(合照並唔一定係越親密越好,有時一啲有趣嘅合照都相當難忘,圖中女優係羽咲みはる。)

合照完記得千祈唔好咁快走,呢個時候你會有少少時間同個女優閒聊幾句,唔識日文都唔駛驚,將事先譯好嘅內容打喺電話入面,直接俾女優睇就可以;但就算識日文都好,都唔好霸住女優太多嘅時間,大概十零廿秒,又或者你見到Staff開始遞手示意你離開嘅時候,就要識做落台了。

落台之後都唔駛太心急走人,可以先檢查一下有冇漏低物品,同埋最重要係檢查一下啱啱影嘅合照,有冇被擺出嚟嘅pose遮咗樣,又或者你同女優有冇唔小心閤埋咗眼等等,如果係以上呢啲情況,可以同Staff反映並且要求補影,多數都可以順利補完遺憾,但要留意嘅係有問題嘅相片要喺Staff面前delete,同埋補影大多數只有一次機會,所以再補影嘅話就唔好重複犯同樣錯誤喇。

DKZ6BJQUMAE5f33

(以上為M男專用pose嘅正確示範,圖中女優係飛鳥りん。)

簽名時間

取決於你參加嘅係流水式作業嘅即售會,定係有限人數但福利比較多嘅預售會,簽名時間都會有少少唔同。如果係即售會嘅話,大多數都唔會有簽名時間,最多只會有一張女優事先簽好嘅簽名相送俾你留為紀念,而如果係有限人數嘅預售會嘅話,因為時間上比較容易控制,喺影完合照之後大多數都會有獨立嘅簽名時間。

喺呢個時候,你除咗可以將你一早準備好嘅簽名物品拎出嚟俾女優簽名之外,仲可以將你頭先因為緊張口窒,喺合照嘅時候冇講到嘅嘢,喺簽名時間慢慢同女優盡訴心中情。當然唔少得就係你一早準備好想送俾女優嘅禮物,都可以喺呢個只屬於你同個女優之間嘅時間入面,為佢送上你絞盡腦汁諗出嚟嘅心水之選,唔知有咩好講?咁大份禮物有排你去介紹啦。

GKemVYsacAAGbmj

(最近幾乎每個月都有event嘅松本いちか,去親佢嘅活動都會喺現場見到唔少女FANS。)

簽名時間可以傾嘅話題多數都比較自由,如果係第一次見面嘅女優,我多數都會介紹自己係由香港嚟,對嗰位女優嘅邊一套片最有印象,又或者見到佢最近喺Twitter IG po咗去邊度飲飲食食等等;間唔中都會遇到啲女優唔係太想傾作品方面嘅話題,如果feel到氣氛唔對路,就可以稍為收一收聲,又或者講下其他吃喝玩樂嘢,對於成個簽名時間乃至活動嘅過程,都會留返一個比較舒服同開心嘅印象同回憶。

最後就係輕輕嘅握手同say拜拜,全程大概5分鐘左右嘅活動時間就正式結束。

GLmvyN5aAAE5 2c

(今年經常喺海外活動見到佢身影嘅涼森れむ。)

以上就係普遍而家大部分會喺秋葉原入面舉辦嘅AV女優event嘅活動流程,寫出嚟好似有啲冗長咁,但當你喺入面玩緊嘅時候,晏眼間以上嘅流程就已經完結得七七八八,大概呢啲就係快樂不知時日過,但喺你心入面、腦海入面、仲有相機入面,帶走嘅就係同心儀女優之間難忘嘅相處,同埋殘留喺身上嘅餘溫體香。

或者,又係時候開始計劃下一次AV Event之旅了。

GMAR4p3aIAAlnCY

(圖中為歌影雙棲嘅希島あいり,下次有機會同大家分享「睇AV女優唱歌」呢一樣咁奇特嘅活動又係咩玩法。)

You may also like

Leave a Comment

此網站只適合二十一歲或以上人士進入,內容可能令人反感及驚嚇;不可將此區的內容派發、傳閱、出售、出租、交給或借予年齡未滿 21 歲的人士或將本網站內容向該人士出示、播放或放映。 LEGAL DISCLAIMER WARNING: THIS SITE CONTAINS MATERIAL WHICH MAY OFFEND AND MAY NOT BE DISTRIBUTED, CIRCULATED, SOLD, HIRED, GIVEN, LENT,SHOWN, PLAYED OR PROJECTED TO A PERSON UNDER THE AGE OF 21 YEARS. 本人已滿 21 歲 ,above age of 21,同意進入 *本網站經由第三者於美國境內以不抵觸美國加州法例條文發放及儲存*
I am 21 or Older I am Under 21