Home Blog 去AV女優event前做足準備:用品篇

去AV女優event前做足準備:用品篇

by 新東寶翻譯製作
4 minutes read

落筆嘅一刻小弟人在東京,進行今年嘅第二次日本AV event之旅,上次嘅主題係AV女優+行公園,今次主題就係AV女優+美食+夜景,內容儘量嘗試滿足唔同界別嘅朋友,到時遊記出街之後希望大家多多支持。

講到AV event,隨住機票價錢開始穩定返啲,大家都開始清一清手頭上儲咗幾年嘅大假。最近亦都多咗唔少巴打向小弟詢問一啲關於呢啲event嘅詳情、玩法等等嘅資訊,有見及此小弟就想開一個專題嚟講講關於呢方面嘅個人經驗分享,希望多多少少都可以幫到第一次接觸呢類活動嘅朋友。

今期就由準備方面開始入手,同大家講解一下參加AV女優event需要準備嘅各項用具。

pwKPnQB

秋葉原其中一個AV女優event聖地,買取販売市場ムーランAKIBA本店。


活動門劵

首先當然係確保event嘅參加門劵已經到手,無論你參加嘅係即售會(冇限人數,可以即場買碟參加,event流程偏向流水式作業),定係預售會(有限人數,通常event前一個月左右開賣,但event嘅整體互動時間較長),都需要有門劵喺手先至可以入場玩。

門劵上面除咗印有event嘅詳細資料,例如活動地點、開始時間、以及最後入場時間之外,仲係你喺呢個event入面,買咗幾多隻「對象商品」嘅證明。買得越多,喺event入面得到嘅福利項目自然就越多,例如買多啲嘅話會多啲拍攝時間,多一兩張同女優嘅合照,又或者可以請女優同你拍一條專屬於你嘅小短片等等。

再加上現場工作人員都係認飛唔認人,無論你有幾大頭蝦都好,千祈唔好唔見咗張門劵,因為唔會有補發呢一個咁貼心嘅舉動,唔見咗就真係冇仇報。

Hzmt0QG

如果咁啱個活動一早完售哂,而你去到現場先發現唔見咗張門劵,到時就真係唔知去嚟做咩喇。

色紙

大部份嘅「預售會」event都會有所謂嘅「私物簽名」環節,通常喺你同女優影完相同合照之後,就會有一段可以同女優一對一嘅相處時間,呢個時候工作人員會問你「今日想女優簽嘅嘢係?」,呢個時候你就可以拎你準備俾女優簽嘅「私物」出嚟。

通常去event,我都會請女優簽喺呢啲文具鋪好易買到嘅色紙上面,色紙有好多唔同嘅類型同大小,有啲係成張全白,亦有啲係有唔同嘅顏色背景,種類繁多;用色紙嘅好處係容易收藏同打理,簽完成張放返入袋就可以,而且因為超薄嘅關係,執行李嘅時候基本上唔會構成任何阻礙,亦都唔怕責喺一堆衫褲下底,可以話係進可攻退可守,就算喺屋企展示出嚟都唔怕有咩尷尬。

當然,話明係「私物」,覺得色紙太普通嘅話,都仲有好多選擇;小弟就親眼見過好多唔同人帶俾女優簽嘅物件:例如手機殼、平時開工會用嘅筆記簿、女優嘅週邊商品、AV宣傳嘅海報、再離譜啲甚至有相機鏡頭、每日揹出街用嘅手袋等等,種類五花八門。

不過唔理係邊一樣都好,女優都有權選擇簽唔簽你帶嚟嘅「私物」,因為畢竟係有自己嘅簽名喺上面,女優同事務所都會驚俾人用做其他用途,所以喺「私物」呢方面,我會建議大家儘量唔好揀啲太標奇立異嘅物件,會比較容易過到女優同工作人員嗰關。

IMG 8992

除咗文具鋪之外,喺日本嘅DONKI同一啲100円百貨鋪都可以買到呢啲色紙,價錢通常係大約100-150円一塊。

相機

每個event基本上都會有拍攝時間,視乎你買嘅對象商品數量,由30秒到一分鐘不等。而家event嘅攝影時間基本上都唔會限制你用啲咩攝影工具,最常見嘅當然就係隨身攜帶嘅智能手機同數碼相機,so far我就未見過人用菲林相機。至於即影即有相機,有啲event都可以接受,但影一張即影即有再加埋等張相紙碌出嚟嘅時間,分分鐘你用普通相機已經可以影多5-6張相,邊一樣性價比比較高就真係見人見智。

唯一要留意嘅係,無論用相機定係手機,都唔可以開拍片modeLive Photo mode,只可以一張接一張咁樣正常拍攝;連拍mode唔太過份嘅話(一秒影2-3),工作人員大多數都唔會阻攔,當然都係以工作人員當時嘅規定為準,請記得遵守規矩。

另外我個人就試過幾次喺影相嘅時候,因為相機出現故障,而需要即時轉用手機影嘅場合。遇到呢啲情況工作人員係唔會為你安排任何補償,所以最理想都係準備一部相機加一部手機,有咩意外嘅時候都可以有另一部補上。

同樣地,影合照嘅時候都可以選擇用手機定相機拍攝,將你手上最好嘅器材拎出嚟,諗一個有趣嘅pose,同女優留低最難忘嘅一刻。

DSCF2626

排緊隊又或者準備到你嘅時候,不妨拎部相機出嚟試一試啲設定有冇問題,因為一到你埋位就唔會有時間俾你慢慢較;另外,喺試嘅過程記得儘量唔好影到女優正面同其他參加者,費事產生不必要嘅誤會。

禮物

煩惱緊簽名嘅時候唔知同女優講咩好?我自己會傾向喺送禮物呢一方面嚟展開話題,喺event入面送禮基本上係Fans嘅恆常舉動,除咗極小部份女優講到明唔會喺event收禮物之外,幾乎99%嘅女優對於收禮物都係相當歡迎。

至於送啲咩先啱,就要睇下你有幾了解個女優了,例如可能你知道佢最近喉嚨經常唔舒服,可能一兩盒喉糖對於佢嚟講已經係最好嘅禮物;比較物質啲嘅,可以選擇一啲你覺得佢會鐘意嘅飾物、又或者衫褲鞋襪、佢鐘意嘅動漫精品等等;再高規格啲嘅,各種各樣嘅名牌手袋絕版靚鞋,女優基本上都唔會拒絕,只要你捨得買。

身在香港嘅我地喺送禮上有唔少優勢,因為幾乎唔會同日本當地嘅FANS有機會重疊,喺香港機場臨上機之前執幾盒餅又或者零食,地道得嚟價錢又唔會太貴,送俾女優嘅時候又可以順便講下呢份香港特色禮物嘅心思,咁就唔駛驚Deadair啦。

FzX2s8NaAAAla2n

有唔少女優都鐘意喺event完咗之後,將當日收到嘅禮物排到靚靚仔仔影張大合照,圖中嘅紅色九巴盒曲奇餅就係今次小弟送俾古川ほのか嘅禮物。

一個放鬆、享受、期待,遵守規矩嘅心情

畢竟係去見一個以前只係隔住屏幕先見到嘅AV女優真人,無論點樣都好都一定會出現緊張嘅情緒,絕對係人之常情,甚至有唔少人喺影相嘅時候手都震埋,事後睇返啲相先發現全部出哂事;以我自己嘅經驗嚟講,儘量放鬆心情,俾自己有一個類似見明星、見偶像嘅期待感覺,就已經相當足夠,再加上AV女優都係一個普通人,聽到有一個人咁遠水路由香港專登搭飛機過嚟見自己,分分鐘個女優比你仲要緊張,所以不妨casual啲放鬆啲,大家好好享受嗰幾分鐘嘅相處時間。

另外有一點好重要,就係成個event嘅相處入面,只有女優可以嚟掂你,你唔可以主動去掂個女優,包括所有例如拖手,任何嘅身體接觸,都需要通過女優同工作人員嘅同意先至可以做。你可以提出合理嘅要求,女優同工作人員亦有權去選擇配唔配合,但唔可以由你去主動觸碰個女優,呢一個係相當相當重要嘅規則,希望大家謹記。

難得有呢啲相處嘅時間,大家都想留低美好嘅回憶,所以記得記得要守規矩,儘量唔好令到女優嘅心目中對香港,以至海外嘅FANS留低唔好嘅印象。

Fy5DqnQaMAAFimJ

同埋有時都要體諒下,AV女優都係一個普通人,連續幾個鐘頭又要俾FANS影相、又要簽名、又要諗話題,event中途真係間唔中會跌下watt。有時如果見真係deadair嘅,唔駛太格硬諗話題,就當俾個女優休息下啦。
圖中嘅係上個星期舉行完活動嘅八木奈々,女優本人喺FANS對應方面係出哂名嘅高手。

以上就係小弟平時去女優event嘅各項準備,去得多同試得多之後,漸漸就會研發出一套自己嘅準備方式,小弟以上嘅準備就俾大家做一個參考,大家可以慢慢發展出自己嘅一套獨有心法,例如每次去見某個女優都必送嘅禮物,合照必定會影嘅pose等等,成為你嘅一個獨特AV女優event秘笈。

下一次有機會再同大家分享其他參加AV女優event嘅經驗同心得,而家落樓下買個牛丼做宵食先,我地喺下一篇文章再見。

You may also like

Leave a Comment

此網站只適合二十一歲或以上人士進入,內容可能令人反感及驚嚇;不可將此區的內容派發、傳閱、出售、出租、交給或借予年齡未滿 21 歲的人士或將本網站內容向該人士出示、播放或放映。 LEGAL DISCLAIMER WARNING: THIS SITE CONTAINS MATERIAL WHICH MAY OFFEND AND MAY NOT BE DISTRIBUTED, CIRCULATED, SOLD, HIRED, GIVEN, LENT,SHOWN, PLAYED OR PROJECTED TO A PERSON UNDER THE AGE OF 21 YEARS. 本人已滿 21 歲 ,above age of 21,同意進入 *本網站經由第三者於美國境內以不抵觸美國加州法例條文發放及儲存*
I am 21 or Older I am Under 21