將性感同搞笑合為一體，會唔會產生出前所未有嘅火花？
2000年時期日本偶像組合興起，AKB48風潮席捲全國甚至衝出日本，各色各類嘅女子組合空巢而出，打算喺市場上分一杯羹。AV業界當然唔會執輸，都要一齊湊一湊熱鬧，但只係以AV女優做賣點，喺當時網絡媒體同傳訊仲未盛行嘅年頭，以大氣電波嘅尺度實在難以俾一班AV女優打入家庭觀眾嘅眼球，有冇可能可以包裝一下，加少少趣味性，令到成件事可以比較容易啲「入屋」呢？
2008年，由電視製作人兼監製マッコイ斎藤領軍，由一班AV女優、寫真女星、水著偶像，所組成嘅女子組合「惠比壽麝香葡萄」正式出道，以搞笑加上性感嘅主題作主打，正式喺地上波深夜電視節目出道。
可以話冇惠比壽麝香葡萄出現嘅話，就唔會有今日喺度同大家分享嘅新東寶翻譯製作，同時呢隊組合亦係小弟開始關注AV業界嘅初心。今日就等我同大家介紹呢一隊定位奇特但又充滿特色嘅女子組合：第二代惠比壽麝香葡萄。
由於小弟初接觸嘅時候已經係第二代惠比壽麝香葡萄嘅時代，所以初代嘅歷史我就唔班門弄斧，請容許我喺以下嘅內文輕輕帶過。
承接上一代惠比壽麝香葡萄成員喺2013年解散，兩年後嘅10月，第二代惠比壽麝香葡萄正式公佈，正如上面所講，成員來自五湖四海，先由大家比較熟悉嘅AV女優開始介紹：首先打頭陣嘅有而家已經成為時裝界女皇嘅明日花キララ、業界公認一線美少女葵つかさ、大家都鐘意聽佢把嗲聲嘅小島みなみ、食可愛大嘅桃乃木かな、仲有大家親切嘅媽媽白石茉莉奈等等。陣容上雖然冇初代成員咁豪華，但該要有嘅成員都有齊，亦都涵蓋到各個界別嘅AV女優，以頭炮成員嚟講相當搶眼。
至於其他成員方面，主要以水著女優同模特兒為主，辰巳シーナ、石岡真衣、夏目花実等等，都係加入惠比壽葡萄之後令更多人認識到佢地；同時，水著女優同AV女優之間嘅化學反應都非常有趣，呢一個相信都係製作人揀水著女優同模特兒入團嘅原因之一，除咗唔會令成隊組合成員都係AV女優之外，仲可以喺節目入面起到一個唔錯嘅平衡作用。
2016-18年係二代葡萄最多人留意嘅年代，除咗因為加入咗兩位二期生，人氣女優三上悠亞，SOD公關社員出身嘅市川まさみ之外，喺電視台嘅深夜電視節目「マスカットナイト」開始有自發嘅中國字幕組製作字幕版本，想當年小弟就係由呢度開始咗以後嘅探索AV女優世界。
二代葡萄嘅出道單曲「Tokyo Sexy Night」，第二隻單曲「Sexy Beach Honeymoon」，都有打入日本嘅唱片銷售榜，雖然名次唔高，但對於一隊脫離主流同傳統嘅女子組合嚟講，成績已經算非常唔錯。
（出道第一隻單曲「Tokyo Sexy Night」，旋律非常入腦，但MV製作就有啲失望。）
(第二隻單曲Sexy Beach Honeymoon，換上水手制服，MV入面仲有非常香豔嘅三點式泳裝。)
（2019年嘅主打歌Ebisu Animal Anthem，MV喺東京各個地標取景，歌曲都相當唔錯。）
（バイバイダーリン、ビビる‐Bodyで‐Boo，呢兩首都係我自己好鐘意嘅unplug歌。）
至於喺綜藝方面，一班AV女優能夠踏足大氣電波殺入電視機，當然唔會放過任何表演嘅機會，但電視尺度所限，可以玩嘅花款總唔能夠太露骨，於是就向日本搞笑藝人嘅方向埋手：衣夾夾鼻、絲襪
笠頭、蛋糕拍臉、藝人模仿，等等各種各樣羞恥得嚟令觀眾哈哈大笑嘅表演，由一班AV優同平時都會保持靚靚形象嘅模特兒出演，新鮮感十足。
職業上嘅特點同表演內容嘅矛盾，有時都係節目嘅吸引點之一，甚至連主持人都會忍唔著講：「平時你地做野更核突更難受嘅都做到，呢啲你反而抗拒？」，AV女優喺鏡頭前挑戰尺度極限，唔露點但露底，唔呻吟但揸著支咪表演快速舌功，呢一類遊戲節目相信只有喺日本先會睇到。
（冇錯，呢個係三上悠亞嚟，呢個造型係根據佢喺節目入面畫出嚟嘅公仔整出嚟。）
（呢集係玩咸濕對白柔道選手權，AV女優喺呢個遊戲有恆常嘅職業訓練做優勢，19:34開始仲可以睇到三上悠亞VS桃乃木かな嘅夢幻對決。）
（輕鬆啲仲有呢類爆料環節，後面仲有玩下爭櫈仔，輸咗嘅要俾人推落扮係熱水嘅浴缸，爬出嚟仲要俾反應。）
時至今日，當初加入嘅初期成員好多都已經離開二代葡萄，本職係AV女優嘅，隨著引退嘅舉動亦都由組合入面畢業；模特兒搵到處好人家，轉形成為哂靚車靚手袋日日去旅行嘅KOL，加入葡萄成為一段唔太想承認嘅過去。大家都有各自嘅出路同去向，可能午夜夢迴聽到熟悉嘅旋律嘅時候，身體都會跳起當年苦練嘅舞步，諗起當年一齊流下嘅歡笑淚水。
今年係第一代惠比壽麝香葡萄成立嘅十週年，適逢日本疫情緩和，喺啱啱過去嘅5月就搞咗一場非常精彩嘅十週年紀念演唱會，一班一代嘅舊成員同二代嘅成員同場表演，堪稱夢幻共演嘅機會，可惜唔能夠親眼睇到。
惠比壽麝香葡萄，就係一隊咁奇特，而又充滿傳奇色彩嘅女子組合，未來又會點樣發展落去？拭目以待。
（十週年紀念嘅歌曲No Victory Without Dream，仲有幾位初代成員客串參演。）
