《牛天神》
銅鑼灣伊榮街9號地下1號舖
星期一至日 12:00 – 22:30
====================================
鍾意食牛丼的你，絕對有得揀。
牛天神位於銅鑼灣伊榮街，地點上黎講，實在係有少少唔方便。但我相信如果做得好，佢將來應該會有更多分店。
點解我咁講？因為牛天神，正正就係別天神的姊妹店，咁你諗下全港有幾多間別天神？
有咩食？
就好似別天神得幾款拉麵一樣咁簡單，牛天神主打牛丼同雞扒飯。
普通牛丼、溫泉蛋牛丼、野菜牛丼、照燒雞扒飯、日式咖喱牛丼同日式咖喱雞扒飯。
乜咁少？
專心做好幾樣野食，好過畀幾十款你揀但樣樣都唔掂。係唔係先？
份量方面，牛肉多過吉Ｘ家，飯量亦都大過吉Ｘ家。
價錢方面，$45 起跳仲有個麵豉湯，其實都好ＯＫ。
味道方面，我就略嫌咸左少少（可能係Uncle 我食得太清淡），但牛肉o既口感係好過吉Ｘ家o既。
因為我幫襯果陣時只係試業，所以水準可能會有參差。
將來再食的話，再 Update 大家。
