文：kiwi
這部電影改篇自歐洲作家Judith Kerr的自傳式小說:《When Hitler Stole Pink Rabbit》。片名聽起來很長對吧？整個故事也很長。短短兩個鐘的電影看似只是回憶作者坎坷的童年，卻是記錄了三十年代的德國，納粹黨高壓統治下猶太人四處逃亡的歷史。
二戰時期，Anna爸爸收到友人溫馨提示，得知自己因言論尖銳而成為希特拉清算名單上的VIP，故詐病逃亡到瑞士，老婆仔女隨後跟上。本身有靚工有靚琴，再養多個好工人嘅典型中產家庭從此開始四海為家。
臨走前媽媽告訴仔女: 「只可以帶兩隻公仔，兩本書」。
Anna選擇留下了她的粉紅色兔仔冇帶走，期待某天可以重返估計和兔仔重逢。搬咗兩次屋之後，她終於放棄了在日記上記錄表離家的日子。或許她們以後都無法回家，又或者只要一家人齊齊整整，有廚房的地方就有家。一家人挨過窮，受過歧視，窮到去塞納河撈銀仔；因為買咗個蛋糕俾老婆，帶咗反叛仔去食蝸牛搞到冇錢交租；闊太的大三角琴變成了一卷印咗黑白鍵的頸巾，返學因尚未能融入而被取笑……最終一家人搬到了英國，生活日漸輕鬆，也算是小團圓結局。
逃亡，難民，為求生計四處奔波，教育，屋租，被通緝，被懸賞，出版自由…… 本身這部電影在德國上架已經是舊年年尾的事，但由於受某國肺炎疫情影響，在香港被拖到今年8月先睇到…… 仲上到架真係意料之外。嘻嘻。一個慢慢開始（其實根本加速到高鐵咁快）高壓管治的香港？還可以享受多久的電影自由？
只可以帶兩隻公仔，兩本書，如何選擇？
雞蛋與高墻站在哪一邊？
片中爸爸說: 「他們沒有良知但我們有，沒有良知的人總是會輸」。
限制出入境，互相篤灰的鄰居，只求分數的教育……哈哈，歷史係咪驚人地相似~ 有幾多家庭曾過著有車有樓有工人的中產生活？其中有幾多已經開始著手準備「逃亡」?
輸？幾時？有幾多人等得到？有些人選擇逃亡，有些人選擇留守，有些想走卻被迫留，有些想留卻只能走。未走嘅人時時羨慕墻外，走咗嘅人日日牽掛墻內。直到最後彼此的聯繫越來越少，越來越多人( )消失……
四處留亡會否成為香港中產家庭的常態？或者其實變換才是永恆？
睇開d啦，風水輪流轉呀嘛，或者不久的將來，「沒有良知的人」就真係輸咗呢？
其實除咗（國安法唔講得）咁灰灰嘅內容外，套片都有好多其他關於家庭，友誼，生活目標之類有趣嘅內容值得深思。如果明知自己留不久就要走，是否還值得花時間認識新朋友？夫妻之間該浪漫還是該現實？與落魄時可以幫你的人曾有牙齒印究竟要不要接受幫助？
有個肯學打關斗為她送行的朋友，童年雖然坎坷卻也未至於悲慘。
最後，「最喜歡的顏色是黃色」，這種莫名其妙的設定或許只有香港人聽到會會心一笑。
Stay yellow ah。
